redacción

O pasado 28 de xullo quedou pechado o prazo de presentación de orixinais ao 1º Premio de Poesía Victoriano Taibo convocado pola Entidade Local de Morgadáns e o Instituto de Estudos Miñoranos (IEM).

Reunido o xurado, presidido polo presidente da Entidade Local de Morgadáns Urbano Esmerode, recibiu 48 orixinais, dos que quedaron eliminados, por diversos defectos de forma, cinco deles, quedando a consideración do xurado 43.

Os organizadores do certame literario queren resaltar a importante participación nesta primeira edición.

O xurado resolverá o cinco de setembro e o premio cunha dotación económica de 3.000 euros, escultura conmemorativa e edición da obra, será entregado a finais de outubro no marco dunha serie de actos en homenaxe a Victoriano Taibo organizados pola Entidade Local de Morgadáns e o Instituto de Estudos Miñoranos que se darán a coñecer no seu momento e que se celebrarán nos locais das Escolas de Guillufe en Morgadáns, onde Victoriano Taibo impartiu docencia entre abril de 1930 e xullo de 1950, longa andaina da que hai que descontar a paréntese de catro anos en Villalar de los Comuneros, nun exilio imposto por sanción gobernativa como consecuencia do seu galeguismo.